U Rwanda rwabaye urwa mbere mu kwakira imiti itangwa na Pfizer ku kiranguzo

U Rwanda rwabaye igihugu cya mbere cyatangiye kubyaza umusaruro amasezerano rwashyizeho umukono arwemerera guhabwa imiti y’Uruganda rwa Pfizer ku mafaranga nk’ayo ku kiranguzo, rwatangiye gukoresha uwa Paxlovid uvura COVID-19.

Posted  223 Views updated 1 month ago

 

Muri Gicurasi 2022 ni bwo Pfizer yatangije gahunda rwise ‘An Accord for a Healthier World’, izatuma imiti n’inkingo byayo bigera ku baturage miliyari 1.2 bo mu bihugu birenga 40 birimo n’u Rwanda.

Ku ikubitiro, iyi gahunda byavuzwe ko izatangirana n’ibihugu bitanu bya Afurika birimo u Rwanda, Malawi, Ghana, Sénégal na Uganda.

U Rwanda rwabaye igihugu cya mbere cyatangiye gusarura kuri iyo gahunda ndetse mu Mujyi wa Kigali hari gutangwa amahugurwa y’iminsi ibiri ku baganga bo mu bitaro bitandukanye mu Rwanda hagamijwe guhana amakuru no kungurana ubumenyi.

Minisitiri w’Ubuzima, Dr Ngamije Daniel, yavuze ko aya mahugurwa ari gutangwa n’impuguke zo muri Pfizer ari imwe mu ntambwe z’ishyirwa mu bikorwa ry’amasezerano azafasha u Rwanda kubona imiti ikorwa na Pfizer ku giciro cy’ikiranguzo.

Yagize ati “Aya mahugurwa agamije gufasha abaganga bacu baturutse mu bitaro bikuru by’igihugu, mu ntara n’uturere guhabwa ubumenyi n’amakuru agezweho y’uburyo imiti ikoreshwa kugira ngo izakoreshwe neza.’’

Dr Ngamije yavuze ko amasezerano ateganya ko hari n’ibindi bizakorwa birimo kunoza ubushakashatsi no kuzamura urwego rw’ubuvuzi bw’indwara zitandukanye.

Ati “Amahugurwa yatanzwe ni intambwe ya mbere ariko hari n’andi makuru azatangirwamo nko kongera ubushobozi bwo gusuzuma indwara zinyuranye hagamijwe kumenya abafite ibibazo bitandukanye n’imiti ikwiriye bagomba guhabwa.’’

Yakomeje “Twumvikanye kongera ubushobozi mu bijyanye no gusuzuma, amahugurwa n’ubushakashatsi cyane ko twahisemo [u Rwanda] icyerekezo cyo kuba igicumbi cyo gukora imiti muri Afurika. Turaganira na bo uko twagira uruhare mu bushakashatsi bukorwa ku miti itandukanye.’’

–  U Rwanda rwakiriye umuti wa mbere uvuye muri Pfizer

U Rwanda rwabaye igihugu cya mbere muri 42 byashyize umukono ku masezerano na bitanu byemeye kuyashyira mu bikorwa, ndetse rwanahawe imiti irimo uwa COVID-19.

Minisitiri Dr Ngamije ati “U Rwanda rwatangiye no kubona imiti ya mbere. Nk’umuti wa Paxlovid turawifashisha mu kuvura abafite ibimenyetso bya COVID-19 kandi mu minsi itanu usanga abantu borohewe.’’

Paxlovid ni ikinini cyakozwe na Pfizer ndetse mu mpera za 2021 cyabaye umuti wa mbere wemejwe na Leta Zunze Ubumwe za Amerika nk’ uvura Icyorezo cya COVID-19.

Mbere y’uko icyo kinini cyemerwa hakoreshwaga imiti itanzwe hifashishijwe inshinge.

Ubwo ‘An Accord for a Healthier World’ yatangarizwaga mu Mujyi wa Davos mu Busuwisi muri Gicurasi 2022, Pfizer yiyemeje gutanga imiti 23 n’inkingo ifite ubu, bivura indwara zitandukanye zirimo na kanseri.

Minisitiri Dr Ngamije aganira n’itangazamakuru kuri uyu wa Kane, tariki ya 14 Nyakanga 2022, yavuze ko iyi miti iri mu yo u Rwanda ruzahabwa kandi ku giciro nk’icyo ku ruganda.

Yagize ati “Imiti irimo ivura COVID-19, ituma abantu bataremba. Harimo n’indi miti ivura indwara za kanseri zitandukanye, iz’uruhu, iza rubagimpande n’izindwi ndwara zivurwa n’imiti ikorwa na Pfizer.’’

Yagaragaje ko mu mikoranire y’u Rwanda na Pfizer izafasha kumenya ingano y’imiti ikenewe bijyanye n’imiterere y’indwara zigenda ziganza ku Isi.

Ati “Tuzanamenya ukuntu twakongera imiti kuko nk’ubu iya kanseri dukeneye kumenya ngo twagura ingana ite dukurikije abarwayi bavurwa iriya ndwara. Dufite kanseri nyinshi, muri ino minsi uko tubona ubushobozi bwo gusuzuma, tubona kanseri zitandukanye.’’

Ibihugu bizahabwa imiti ku giciro cy’ikiranguzo birimo 27 bikennye (low-income countries) n’ibindi umunani bifite ubukungu bwisumbuyeho gato (lower-middle-income countries), byinjiye muri icyo cyiciro mu myaka 10 ishize.

Biteganyijwe ko uko imiti izagenda ishyira ku isoko imiti n’inkingo, byitezwe ko bizongerwa muri iyi gahunda yo kubigeza ku bihugu bitandukanye ndetse bigatangwa nta nyungu isabwe, ni ukuvuga ku giciro cyo ku ruganda.

Image

Your reaction?

0
LOL
0
LOVED
0
PURE
0
AW
0
FUNNY
0
BAD!
0
EEW
0
OMG!
0
ANGRY
0 Comments